Fréttir

Nú er komið á markað frá okkur ný vara í barnalínunni okkar, Mömmukrem í 50 ml túpum. Mömmukremið er sérstaklega ætlað fyrir konur með barn á brjósti til að bera á geirvörturnar. Kremið er mjög mjúkt og hæfilega þykkt til að auðvelt sé að bera það á í þunnu lagi eins oft og nauðsynlegt er. Innihaldsefni í kreminu eru ullarfeiti, ólífuolía og lífræn kókosfeiti ekki er því nauðsynlegt að þrífa kremið af áður en barnið er lagt á brjóst. Kremið hentar einnig til notkunar á þurra húð annars staðar á líkamanum eða sem fyrirbyggjandi meðferð við þurrk á geirvörtum á meðgöngu. Kremið fæst í helstu apótekum um allt land   

Nú eru Bio Ice kremin komin í dreifingu hjá Parlogis. Um er að ræða tvær gerðir af náttúrulegum kremum sem samanstanda meðal annars af lífrænum íslenskum jurtum og hreinum næringarríkum olíum. Bio Ice krem fyrir þurra húð (100 ml túpa): er raka- og næringarkrem með græðandi eiginleikum. Kremið þykir virka vel á t.d. exem, sólbruna, þvagbruna, bólur, sprungna húð og brunasár. Bestur árangur næst með því að bera kremið á erfið svæði 2-3 sinnum á dag þangað til húðin grær og eftir það skal bera kremið á eftir þörfum. Bio Ice krem við skordýrabiti og brunablöðrum (50 ml túpa): þykir mjög fljótvirkt og græðandi á t.d. skordýrabit og brunablöðrur. Kremið slær fljótt á kláða og önnur óþægindi í húð. Hægt er að panta kremið hjá Parlogis en einnig mun það, meðal annars, fást í eftirtöldum verslunum og apótekum: Laugarnesapótek, Garðsapótek, Rimaapótek, Reykjvíkurapótek, Lyfjaval Mjódd, Lyfjaval Álftamýri, Lyfjaval Bílaapótek í Kópavog, Árbæjarapótek og Fjarðarkaup.

Vegna fyrirspurna um hvar nýja barnalínan okkar sé seld þá viljum við benda fólki á verslanir Lyfju um allt land, Laugarnesapótek, Reykjavíkurapótek, Lyfjaver sem og fleiri apótek á Stór-Reykjavíkursvæðinu. Barnalínan samanstendur af:  Bossakremi sem er 18% zinkkrem ætlað á bleyjusvæðið Barnakremi sem er 3% karbamíðkrem, sérstaklega mjúkt og hannað með barnshúðina í huga Barnapúður sem er hreint talcum-púður án allra ilm-og litarefna. Barnaolía, hrein og góð olía án rotvarnarefna sem samanstendur af úrvals olíum.

Pharmarctica óskar viðskiptavinum sínum og samstarfsaðilum, gleðilegs nýs árs með þökkum fyrir viðskiptin og samskiptin á liðnu ári.  

Nú líður að jólum og hefur verið ákveðið að fyrirtækið verði lokað frá og með 23. desember 2009 til og með 3. janúar 2010. Við verðum því mætt hérna aftur, eldhress eftir gott jólafrí, þann 4 janúar. Ef nauðsynlegt reynist að ná í starfsmenn á þessu tímabili bendum við á símanúmer í starfsmannaskrá.

Nú fást 12 af okkar vörum í öllum verslunum Samkaupa (Nettó, Kaskó, Strax og Úrval). Þær vörur sem hægt er að kaupa í þessum verslunum eru: Akvól í 100 ml túpu, Cetricide sárakrem í 100 ml krukku, Handspritt með dælu í 300 ml flösku, Vaselín í 100 ml krukku, Hydrofíl rakakrem í 100 ml túpu, Hælakrem í 100 ml krukku, Júgursmyrsl í 100 ml krukku, Karbamíðkrem 10% í 200 ml túpu, Kókosfíl alhliða rakakrem í 100 ml túpu, Kuldakrem í 50 ml krukku, Mentólvaraáburður í 15 ml krukku og Stjörnuhandáburður í 100 ml túpu.

Þá er komið að því að Barnalínan okkar er komin á markaðinn en jafnframt er um að ræða sjöttu línuna okkar. Barnalínan fékk gulan lit sér til aðgreiningar.  Línan sem samanstendur í dag af fjórum vörutegundum  en sú fimmta mun bætast í hópinn von bráðar. Hér má sjá aðeins um hverja vöru: Barnakrem: er feitt krem fyrir þurra og viðkvæma barnshúð sem má bera á allan líkamann. Inniheldur 3% karbamíð. Fæst í 100 ml túpum. Vnr 12000082. Barnaolía: er mýkjandi og húðnærandi olía með mildum rósailm. Olían er góð til að bera á eftir sund og bað en einnig er hægt að nota hana sem nuddolíu. Fæst í 300 ml flöskum. Vnr 12000104. Barnapúður: er hreint talcum-púður sem að þurrkar upp rök húðsvæði t.d. á bleyjusvæðinu, í húðfellingum eða á milli táa. Fæst í 100 ml flöskum. Vnr 12000103. Bossakrem: er mjúkt 18% zink-krem sem varnar þvagbruna. Kremið á að bera á í þunnu lagi á hreina og þurra húð við bleyjuskipti eða þangað til húðin verður heil á ný. Fæst í 50 ml túpum. Vnr. 12000119.

Nú fæst Kalii permanganat 3% einnig í 100 ml flöskum. Varan fæst eins og aðrar vörur frá okkur, hjá Parlogis. Vörunúmerið er 12000700. Við minnum svo á að varan mun áfram fást í 500 ml flöskum.

Komin er á markað ný forskrift af Golytely sem inniheldur meiri styrk innihaldsefna til að auka virkni lyfsins. Eldri forskrift var kölluð inn til þess að koma í veg fyrir að tvær forskriftir með mismunandi styrkleika væru í umferð í einu. Jafnframt hefur verið ákveðið að bjóða ekki lengur upp á vöruna í 1 lítra umbúðum til að koma í veg fyrir mistök við blöndun. Núna fæst Golytely einungis í 3,8 lítra brúsum og í hvern brúsa þarf að bæta 2 lítrum af vatni. Fyrst um sinn verða allar umbúðir með nýju forskriftinni merktar með hvítum límmiða sem á stendur: Athugið. Ný forskrift. Blandist með 2 lítrum af vatni. Hægt er að hafa samband við Pharmarctica í síma 461-3550 til að koma með fyrirspurnir eða ábendingar. Pharmarctica biður viðskiptavini sína afsökunar á þeim óþægindum sem þetta kann að valda.  

Græðarinn (Kláðastillandi áburður) er nú kominn með nýtt útlit. Þessi vinsæli áburður sem hingað til hefur verið í 100 ml túpum mun nú framvegis aðeins fást í 100 ml flöskum með sprautuplöggi. Græðarinn er einstaklega róandi áburður sem hentar vel á kláða í húð. Áburðurinn hefur verið notaður á smásár, bleyjuútbrot og önnur útbrot á húð sem að valda kláða.